மனிதர்களின் மகப்பேறு ஏன் சிக்கலானது?

'நம்ம முன்னோர் எல்லாம் வீட்டுல குழந்தை பெத்துக்கலையா? ஆறு ஏழு பெத்துக்கிட்டு செழிப்பா வாழலையா?'
ஆமாம், ஆத்தாக்கள் ஆறு ஏழு என்று பெற்றார்கள், தாத்தாக்கள் இரண்டு மூன்று என்று மனைவி கட்டிக்கொண்டார்கள். மூன்று தலைமுறை தாண்டிப் பாருங்கள் உங்கள் வீட்டிலும் ஒரு தாத்தாவிற்கு இரண்டு மனைவி இருந்திருப்பார், முதல் மனைவி மகப்பேறுச் சிக்கலினால் இறந்திருப்பார்.
நிச்சயம் அவர்கள் முட்டாள்கள் இல்லை, அவர்களுக்கு வேறு வழியில்லை. புத்திசாலிகளாய் இருந்த காரணத்தினால் தான் மருத்துவ வசதி பெருகியதும் வீட்டில் பிள்ளை பெருவதை நிறுத்திவிட்டார்கள். அதனால் தான் நீங்களும் நானும் மரணிக்காமல் இன்று இதைப் பற்றி விவாதித்துக் கொண்டிருக்கிறோம்.

மகப்பேறு இயற்கை தானே? ஆமாம் மகப்பேறும் இயற்கை தான் அதில் தாயும் சேயும் இறப்பதும் இயற்கை தான். மனிதர்களின் மகப்பேறு என்பது மிகவும் சிக்கலானது. அதைவிடச் சிக்கலான பேறு காலம் கொண்ட பாலூட்டிகள் ஒன்றிராண்டு தான். அவற்றின் பேறு கால தாய் சேய் இறப்பு விகிதமும் மிக அதிகம். இது தான் இயற்கை, மீண்டும் வாசியுங்கள், இது தான் இயற்கை.

பல மில்லியன் ஆண்டுகளுக்கு முன்னால் மனிதர்கள் இரட்டைக்காலில் நடக்கத் தொடங்கிய போது அவர்கள் இடுப்பு எலும்பு குறுகத் தொடங்கியது. மனித மூளை வளர்ச்சி அடையத் தொடங்கிய போது மண்டையும் பெரிதானது. மண்டை பெருத்த குழந்தைகள் குறுக்கு சிறுத்த மனிதர்களுக்கு பிறக்கத் தொடங்கினார்கள், பிறக்கிறார்கள். அப்படிப் பிறந்தால் இயற்கையில் அது சிக்கல் தான். பலர் இறந்து தான் போனார்கள். 2 மில்லியன் ஆண்டுகளுக்கு முன்பிருந்து இருபது ஆண்டுகளுக்கு முன்பு வரை அது தான் இயற்கை.

வரையாட்டுக் குட்டி ஒரு வாரத்தில் நரியிடம் இருந்து தப்பி ஓடும், வடதுருவத்தில் போட்டதும் ஆட்டுக் குட்டி வலசை போகும் தன் கூட்டத்தோடு இன்னல்களைக் கடந்து நடக்கும், யானைக் குட்டி பஞ்ச காலத்திலும் தண்ணீர் தேடி அம்மாவுடன் நடக்கும். இது எதுவும் மனிதக் குட்டிகளுக்கு சாத்தியம் இல்லை. ஏனென்றால் மனிதக் குட்டிகள் அவற்றைப் போல முழு வளர்ச்சி அடைந்து பிறப்பதில்லை. மூளை பெரிதாக இடை சிறிதானதும் பேறுகாலம் சிக்கலானது. முழு வளர்ச்சியடையாமல் பிறந்த குட்டிகளும் அவற்றின் தாயுமே பிழைத்தனர்.

இத்தனை சிக்கலையும் மனித இனம் இந்த ஒற்றை மூளைக்காகத் தான் கடந்திருக்கிறது.
அப்படிப் பெரிதான மூளை நம் காலத்தில் இந்தப் பல மில்லியன் ஆண்டுகால சிக்கலுக்கு வழி கண்டுபிடித்திருக்கிறது. இவ்வளவு காலம் மனித சமூகம் பெரிய தலையைத் தூக்கிக் கொண்டு இரண்டு காலில் நடந்ததிற்கு இப்பொழுது தான் பலன் கிடைத்திருக்கிறது. இயற்கையின் உந்துதலினால் அதனைக் கண்டு அடைந்திருக்கிறோம்.

எதையுமே புரிந்துகொள்ளாமல் 'பிரசவம் இயற்கை, நம் முன்னோர்கள்' என்று கிளம்ப வேண்டாம்.

பணத்திற்காக அறுவை சிகிச்சை செய்வார்கள் என்று பயமாய் இருந்தால் அக்கம் பக்கம் கேளுங்கள். நல்ல மருத்துவமனைக்குச் செல்லுங்கள். வீட்டுப் பிரசவம் பற்றிப் பேசுவது பகிர்வது செய்யும் நேரத்தில் நல்ல மருத்துவமனைகள் பற்றி பேசுங்கள் பகிருங்கள்.

நல்ல உணவை உண்கிறோம், நஞ்சில்லாத காய்கறிகள் வாங்கி சமைக்கிறோம். எல்லாம் எதற்காக? நாளை நளமுடன் நம் குழந்தைகளோடு வாழத் தானே? அத்தனை நல்லதையும் ஒரே தவறான செயலால் தூக்கிக் குப்பையில் வீசுவது மடமையல்லவா?

ஆண்களுக்கு! நீங்கள் உங்கள் உயிரைக் கொடுத்துப் பிள்ளை பெறப் போவதில்லை, சன்னி வந்து சாகப் போவதில்லை. அதனால் அமைதியாய் இருங்கள். அப்பா பட சமுத்திரக்கனி போல ஆணாதிக்க சிந்தனையோடு மனைவி இப்படித் தான் குழந்தை பெற வேண்டும் என்று வற்புறுத்தாதீர்கள், மண்டை கழுவாதீர்கள்.

பெண்களுக்கு! உங்கள் குழந்தையை உங்களைவிட யார் நன்றாகப் பார்த்துக் கொள்ள முடியும்? அவர்களை மனதில் கொண்டு முடிவெடுங்கள். யாராவது ' ஆட்டுக்கல்லில் மாவாட்டுங்கள் தோழி! வீட்டில் சுகப்பிரசவம் ஆகும் தோழி' என்று சொல்லிக் கொண்டு வீட்டுப் பக்கம் வந்தால் சற்றும் சிந்திக்காமல் அதே ஆட்டுக்கலை அவர்கள் தலையில் போடுங்கள்.
ஆட்டுக்கல்லில் மாவாட்டுவதும் ஜிம் போய் உடற்பயிற்சி செய்வதும் உங்கள் விருப்பம், உரிமை. இவர்கள் பேச்சுக்கள் உங்கள் குற்ற உணர்ச்சிகளைத் தூண்ட விடாதீர்கள். நல்ல மருத்துவமனைக்குச் சென்று பிள்ளை பெற்றுக் கொள்ளுங்கள்.

Aug 02 2018.

பரிணாமக் கோட்பாடு - கேள்வி பதில் 1

கேள்வி: குரங்கில் இருந்து மனிதன் வந்திருந்தால் குரங்குகள் ஏன் இன்னும் இருக்கின்றன?

பதில்: ஒரு உதாரணம் சொல்கிறேன்.
உங்களது தாத்தா ஊரில் விவசாயம் செய்தவர், கட்டு உடல் கட்டை மீசை என்று இருந்தவர். உங்களது பெரியப்பாவின் மகன் இப்போதும் உள்ளூரில் இருக்கிறார்.

உங்கள் அப்பா ஊரைவிட்டு நகரம் சென்று நீங்கள் வெளிநாடும் சென்றுவிட்டீர்கள். மீசை எல்லாம் எடுத்து கொஞ்சம் தோலும் வெளுத்துவிட்டது.

உங்களையும் உங்கள் பெரியப்பா மகனையும் நிற்க வைத்துப் பார்த்தால் அவர் தான் உங்களைவிட உங்கள் தாத்தாவைப் போல இருப்பார். அவரைப் பார்ப்பவர்கள் அனைவரும் உங்களது தாத்தாவைப் பார்த்தது போலவே இருக்கிறது என்கிறார்கள். அப்படிச் சொன்னாலும் உங்கள் பெரியப்பா மகனும் உங்களது தாத்தாவிலிருந்து நிறைய மாற்றங்களை அடைந்திருப்பார். ஆனால் உங்களைப் போன்ற மாற்றாங்கள் இல்லை.

1. பார்க்க உங்களது தாத்தாவைப் போல இருக்கிறார் என்பதற்காக அவர் உங்கள் தாத்தா இல்லை.
2. உங்கள் பெரியப்பா மகன் எப்படி உங்கள் தாத்தாவிற்கு வாரிசோ அதேயளவு நீங்களும் அவருக்கு வாரிசு தான். வெளிநாடு போய்விட்டீர் என்பதற்காக அவர் உங்களது தாத்தா இல்லை என்று ஆகிவிடாது.
3. நீங்களும் உங்களது பெரியப்பா மகனும் ஒன்றுவிட்ட சகோதரர்கள் தான்.

(இந்த உதாரணத்தை யாரையும் பழிப்பதற்காய் எடுத்துக் கொள்ளவில்லை. ஒரு எளிய புரிதலுக்காகத் தான். உங்களுக்குத் தகுந்தாற்போல் மாற்றிக் கொள்ளலாம்)

நீங்கள் தான் இன்றைய மனிதர்களான Homo sapiens. உங்களது பெரியப்பா மகன் தான் இன்றைய சிம்பன்சி போன்ற மனிதக் குரங்குகள். உங்களது தாத்தா தான் இன்றைய மனிதர்களுக்கும் குரங்குகளுக்கும் மூதாதை. மனிதன் குரங்கிலிருந்து பரிணமித்தவன் என்று சொல்வது இன்றைய குரங்குகளில் இருந்து அல்ல. மூதாதைக் குரங்குங்களிடமிருந்து. அந்த மூதாதையர்கள் நம்மைக் காட்டிலும் இன்றைய குரங்குகளோடு கூடுதல் ஒற்றுமை கொண்டிருந்தனர். நாம் இரண்டு காலில் நடப்பது, மரத்தைவிட்டு கீழ் இறங்கியது என்று நிறைய மாறிவிட்டோம், வெளிநாடு போன நீங்கள் மாறியது போல. இன்றைய குரங்குகளும் நமது மூதாதையரிடம் இருந்து நிறைய மாறியிருப்பார்கள்.

1. மனிதர்கள் இன்றைய குரங்குகளிலிருந்து பரிணமிக்கவில்லை.
2. இன்றைய மனிதர்களுக்கும் இன்றைய குரங்குங்களுக்கும் ஒரே மூதாதையர் தான்.
3. நாமும் இன்றைய குரங்குகளும் ஒன்று விட்ட சகோதரர்கள்.

பி.கு: இந்த உதாரணம் 100% விளக்கம் தரவில்லை. இது வெறும் அடிப்படைப் புரிதலுக்கான எடுத்துக்காட்டும் விளக்கமும் மட்டுமே.

பரிணாமக் கொள்கை பற்றி வேறு ஏதாவது கேள்விகள் இருந்தால் கேளுங்கள். இது போல எளிய விளக்கம் சொல்ல முயலலாம்.

ஞானம் (wisdom) என்னும் 68 வயதுப் பறவை

எந்தப் பறவை அதிக ஆண்டுகள் வாழும் என்ற கேள்விக்கான விடை தான் இப்பதிவு.

மனிதர்களுக்குத் தெரிந்து இயற்கையில் வாழும் பறவைகளில் ஞானம்(wisdom) என்னும் பெயர் கொண்ட லெய்சேன் அல்பட்ராசு (Laysan Albatross) இனத்தைச் சார்ந்த பறவை தான் மிகவும் வயதான பறவை. 68 வயதான இப்பறவை 2018 ஆம் 37 வது முறையாக முட்டை வைத்துக் குஞ்சு பொரித்தது.

பொதுவாகவே லெய்சேன் அல்பட்ராசு பறவைகள் அதிக வாழ்நாள் கொண்டவை. 50,60 வயதைத் தாண்டிய இந்த இனப்பறவைகள் நிறைய இருக்கின்றன. தன் வாழ்நாள் முழுக்க ஒரே இணையுடன் வாழும் பறவை இது. ஆண்டுக்கு ஒரேயொரு முட்டையை மட்டுமே வைத்து அடை காக்கும் இப்பறவைகள். ஆண் பெண் இரண்டுமே முட்டையை அடைகாத்தல், குஞ்சுகளுக்கு உணவு தேடல் என அனைத்து வேலைகளையும் பகிர்ந்து கொள்ளும். கிட்டத்தட்ட குஞ்சுகளுக்காக 7 மாதம் செலவிடுவதால், பெரும்பான்மையான பறவைகள் ஆண்டுதோறும் முட்டையிடுவதில்லை, விட்டுவிட்டே முட்டையிடுகின்றன. தன் வாழ்நாளில் 90 சதவிகிதத்தை கடலில் கழிக்கும் இப்பறவைகள் முட்டையிடும் காலங்களில் தான் பிறந்த இடத்திற்கே திரும்பி வருகின்றன. பென்குயின்களைப் போலவே கிட்டத்தட்ட ஒரு மில்லியன் அல்பட்ராசுகள் சேர்ந்து ஒரே இடத்தில் இனப்பெருக்கம் செய்கின்றன. 

ஞானத்தைப் பற்றிக் கொஞ்சம் பார்ப்போம். 1956 ஆம் ஆண்டு உயிரியலாளர் சேண்ட்லர் ராபின்சு ( Chandler Robbins) கிட்டத்தட்ட ஐந்து வகையான ஞானத்தின் காலில் அடையாளப்பட்டையை மாட்டினார். 46 ஆண்டுகள் கழித்து 2002 ஆம் மீண்டும் ஞானத்தைப் பார்த்த போது தான் அவருக்குத் தெரிந்தது முதலாம் ஆண்டு தான் அடையாளப்படுத்திய 8,400 பறவைகளில் ஒன்று தான் இது என்று. தனது 97 ஆவது வயதில் 2017 ஆம் ஆண்டு அவர் இயற்கை எய்தினார். அவர் அடையாளப்படுத்திய ஞானம் இன்னும் உயிருடன் இருக்கிறது. கூடவே பறவையாளர்களுக்கு தகவல் களஞ்சியமாகவும் விளங்குகிறது.

ஞானத்தின் வாழ்க்கையைத் தொடர்ந்து கவனிப்பதன் மூலம் லெய்சேன் அல்பட்ராசு இனத்தைப் பற்றிய பல புரிதல்கள் ஆராய்ச்சியாளர்களுக்கு கிடைத்துள்ளது.  Midway Atoll வனவிலங்குகள் சரணாலயத்தில் 2018 ஆம் ஆண்டு ஞானம் 37 வது முறை முட்டையிட்டுக் குஞ்சு பொரித்து தன் இணையுடன் அதனை வளர்த்து வருகிறது. என்ன வியப்பு என்றால் 2001 ஆம் பொரித்த ஞானத்தின் குஞ்சுவொன்று, இந்த முறை முதன்முறையாகத் தான் பிறந்த இடத்திற்கே வந்து முட்டையிட்டிருக்கிறது.

அமெரிக்க மீன் மற்றும் கானுயிர் சேவகத்தைச் சார்ந்த உயிரியலாளர் கெல்லி குடேல் (Kelly Goodale) தனது வலைப்பூவில் சொன்னதாவது "Midway Atoll இல் இருக்கும் அல்பட்ராசு வாழ்விடமானது பல மில்லியன் அல்பட்ராசு பறவைகளை மட்டுமல்ல பல தலைமுறைகளையும் பல குடும்பங்களையும் உள்ளடக்கியது. கொஞ்சம் கற்பனை செய்து பாருங்களேன், அடுத்த முறை ஞானம் இந்த இடத்திற்கு திரும்பி வரும்போது தனது குஞ்சுகளோடும் அவற்றின் குஞ்சுகளோடும் சூழப்பட்டு இருக்கும்"

கழுகு இரண்டின் காதல் கதை ❤️

கழுகுகளுக்கு வயதானதும் இறக்கையின் எடை கூடிவிடும், அதன் நகங்களும் அலகும் மிகப்பெரிதாகி அதனால் வேட்டையாட இயலாமல் போய்விடும். அது உடனே நகத்தையும் அலகையும் உடைத்து விட்டு, இறக்கையைப் பிய்த்துவிட்டு 5 மாதம் மலையுச்சியில் பட்டினியாய் தவமிருந்து, அலகும் நகமும் இறகும் வளர்ந்த பிறகு வேட்டையாடும். பிறகு 100 ஆண்டுகள் வாழும்.

மேலே சொன்ன அனைத்துமே கட்டுக்கதை. இது இணையம் முழுதும் உலா வருகிறது. மேலாண்மை வகுப்பு என்ற பெயரில் இந்தக் கழுகு போல இருங்கள் என்று வேறு சொல்லிக் கொடுப்பார்கள். உண்மையில் இதெல்லாமே பொய்.

இந்தக் கதையை வெண்டலைக் கழுகுகளுக்கும் சில சமயம் பிணந்தின்னிக் கழுகுகளுக்கும் ஏற்றிக் கூறுவார்கள். அதெல்லாமே கட்டுக் கதை தான். வெண்டலைகள் அதிகப்படியாக 27 ஆண்டுகள் வாழ்ந்திருக்கின்றன, இதுவே அதிகம் தான். பிறகு ஏன் இப்படிக் கட்டுக் கதைகள் சோடிக்கப்படுகின்றன என்று கேட்கிறார்களா? அதெல்லாம் content கிடைக்காத பட்டிமன்றப் பேச்சாளர்கள் சொல்லி வைத்தது.

ஐயோ! இயற்கையில் இப்படி கதைகளே இருக்காதா, என் வாழ்க்கையே பொய்யா என்றெல்லாம் வருத்தப்பட வேண்டாம்.

வடகிழக்கு அமெரிக்கப் பறவையாளர்களையும், அமெரிக்கத் தலைநகர வாசிகளையும் இந்த ஆண்டு காதலர் நாளன்று இருக்கையின் ஓரத்தில் அமர்ந்து கொண்டு நகம் கடிக்க வைத்தக் காதல் கதை ஒன்று இருக்கிறது. 'மனிதர் உணர்ந்து கொள்ள இது மனிதக் காதல் அல்ல அல்ல அல்ல' என்று சொன்ன காதல் கதை.

கழகு இரண்டின் காதல் கதை ❤️

அமெரிக்கத் தலைநகரில் கழுகுக் கூடொன்று இருக்கிறது. அங்கு தான் நீதியும் (Justice) விடுதலையும் (Liberty) வாழ்ந்து வருகிறார்கள். இவர்களின் சொந்த ஊர் அதுவல்ல. ஒரு வகைப் பூச்சிக்கொல்லியால் அமெரிக்காவில் பெரும்பாலன இரையாடிப் பறவைகள் அழிவிளிம்பை எட்டின. அப்பூச்சிக்கொல்லிக்கு தடைவிதித்து இரையாடிகளை அமெரிக்கா மீட்டெடுத்தது. தலைநகரில் வெண்டலைக் கழுகுகள் இல்லாமல் போனதால் வடக்கே வேறொரு மாநிலத்தில் இருந்து கழுகுகள் கொண்டு வரப்பட்டு இங்கே விடப்பட்டன.

அப்படி வந்தவர்களின் வழித்தோன்றல் தான் நீதியும் விடுதலையும். 14 ஆண்டுகளுக்கு முன்பு தென்மேற்கு வாசிங்கடனில் கூடிகட்டிக் குடியமர்ந்தனர். அன்றிலிருந்து பிரியாத இணையாக இருந்த அவர்கள் ஆண்டுதோறும் முட்டையிட்டுக் குஞ்சுகள் பொரித்து மகிழ்ச்சியாக வாழ்ந்து வந்தனர். இவர்களை நேரடி ஒளிபரப்பு மூலம் பார்த்து மக்களும் மகிழ்ந்திருந்தனர்.

கடந்த பிப் 9 ஆம் தேதி மீண்டும் இணை சேர்ந்தது இந்த இணை. அடுத்த நாளே விதி வீட்டுக்குள் கபடி விளையாடியது. நீதி திடீரென்று காணமற் போனது. இந்த நேரத்தில் விடுதலை இரண்டு முட்டைகளையும் வைத்தது. இன்னும் குளிர் காலம் முடிவடையாத நேரத்தில் உறையும் பனியில் முட்டையையும் அடைகாத்துக் கொண்டு மீனும் பிடிக்க வேண்டிய நிலைக்கு தள்ளப்பட்டது விடுதலை.

இந்த நேரத்தில் தான் இன்னொரு இளம் வெண்டலை விடுதலையின் கூட்டுக்கு வந்தது. அதன் காலில் இருந்த சிறு காயங்களை வைத்து ஒரு வேளை நீதிக்கும் இதற்கும் ஏற்பட்ட சண்டையில் நீதி தோற்று எங்கேயோ அடிபட்டு ஓடிவிட்டதோ என்ற ஐயம் பறவையாளர்களுக்கு வரத் தொடங்கியது. விடுதலைக்கு வந்த புதியவனைப் பிடிக்கவில்லை. அவனைக் கண்டுகொள்ளவில்லை. அப்பாடா என்று பெருமூச்சு விட்ட மக்கள் நீதியைத் தேட தொடங்கினார்கள். 'யாராவது பார்த்த சொல்லுங்க' என்று முகநூலிலும் செய்தித்தாளிலும் எழுதி தலைநகர மக்கள் புலம்பிக் கொண்டிருந்தார்கள்.

இந்த நிலையில் ஒரு நாள் விடுதலையும் தன் கூட்டைவிட்டு போய்விட்டது. இரண்டு நாட்கள் வரவில்லை. முட்டைகள் இரண்டும் குளிரில் வீணாய்ப்போயின. மீண்டும் விடுதலை வந்ததும் இன்னொரு இளம் வெண்டலை அதன் கூட்டிற்கு வந்தது. இது முன்னதை விட இன்னும் கொஞ்சம் கரிசனத்தோடு நடந்து கொண்டது, முட்டையை அமர்ந்து அடையெல்லாம் காத்தது. நீதி வராது என்று முடிவு செய்தோ என்னமோ இந்த வெண்டலையோடு பறந்து சென்றது விடுதலை.

இப்படி இருக்க 19 நாட்கள் கழித்து திடீரென்று ஒரு நாள் கூடு திரும்பியது நீதி. விடுதலையில்லாத போது கூட்டுக்கு வந்து காத்திருந்தது. விடுதலை வந்தால் என்ன செய்யும்? ஏற்குமா ஏற்காதா?

விடுதலை வரும்போது கூட்டிற்கு பக்கத்தில் கிளையில் அமர்ந்து கொண்டது நீதி. விடுதலை கூட்டுக்குத் திரும்பி வந்தது. நீதியை எங்க வந்த என்பது போலப் பார்த்துவிட்டு, தான் பிடித்து வந்த மீனை உண்ணத் தொடங்கியது விடுதலை.
சரி நம்ம விடுதலை தான என்பது போல மீனில் கை வைக்கப் போனது நீதி. 'மீன்ல கைய வச்ச, வச்ச கைய வெட்டிருவேன்' என்பது போல உறுமிவிட்டு தன் மீனைத் தான் மட்டுமே தின்று கொண்டிருந்தது விடுதலை.

பெரியதாய் ஏதாவது தப்பு செய்ததற்கு மனைவி சண்டைக்குப் போனால் 'நான் வேணும்னா காப்பி போட்டுக் கொடுக்கவா' என்று கேட்கும் கணவனைப் போல, நீதியும் கூட்டில் இருந்த குச்சியை அடுக்குவது போல பாவனை செய்தது.

இதே நாடகம் இன்னும் சில நாள் அரங்கேறிய பின்பு 'சரி போ, இந்த ஒரு தடவ மன்னிக்கிறேன்' என்று விடுதலை நீதியை ஏற்றுக் கொண்டது. மீண்டும் இணை சேர்ந்தனர் இருவரும். மகிழ்ச்சியில் ஆழ்ந்தனர் மக்கள்.

இருவரும் இல்லாத நாளில் இரண்டு முட்டைகளையும் (பொரிக்கவே போகாத முட்டைகள் தான்) ரக்கூன் ஒன்று வந்து தின்றுவிட்டுச் சென்றது. நீதியை விட்டுட்டு மக்கள் ரக்கூனைத் திட்ட தொடங்கினர். இனி இந்த ஆண்டு அவை குஞ்சு பொரிக்கா.

14 ஆண்டுகள் சேர்ந்திருந்த இணை அடுத்தாண்டு சேர்ந்திருக்குமா? இல்லை நீதியின் போக்குப் பிடிக்காமல் விடுதலை விடுதலை பெருமா? காலம் தான் பதில் சொல்ல வேண்டும்.

Fire and Blood (300 years before Game of Thrones) - நூல் விமர்சனம்.

ஏதேவது ஒரு விசேச நாளில் வீட்டில் அம்மா தடபுடலாக பத்து பதினைந்து வகையான உணவு சமைத்துக் கொண்டிருப்பார். நிறைய சமைப்பதால் நேரம் ஆகிக் கொண்டே இருக்கும். நமக்கோ அப்போது தான் பசி வயிற்றைக் கிள்ளும். சமையற்கட்டில் இருந்து ஆளைத் தூக்கும் வாசம் வேறு வரும். 'அம்மா பசிக்குது. அம்மா பசிக்குது' என்று புலம்பும் போது, அவரும் அய்யோ பாவம் என்று மதியம் வைத்த குழம்பை முறுக்குத் தொட்டு சாப்பிடச் சொல்வார். சும்மா நாளில் காயை ஒதுக்கி வைத்து முறுக்கோடு சாப்பாடு சாப்பிடும் நமக்கு அன்றைக்கு அது உள்ளே இறங்கவே இறங்காது.

நிற்க!
இதே போலத் தான் இந்த நூலைப் படிக்கும் போதும் இருந்தது. A song of ice and fire (Game of thrones series) நூல் தொடரின் ஆறாவது நூலிற்காக 6 வருடத்திற்கும் மேலாக வாசகர்கள் எல்லாம் காத்துக் கொண்டிருக்க, தொலைக்காட்சித் தொடரும் நூலை முந்திக் கொண்டு எட்டாவது ஆண்டில் அடியெடுத்து வைக்க, மார்டின் அவர்களோ இன்னும் 6 ஆவது நூலை வெளியிடவில்லை.

தொடர்ந்து அவரை வாசகர்கள் நச்சிக் கொண்டே இருக்க அவரும், முன்கதைகளை அங்கொன்றும் இங்கொன்றுமாக வெளிட்டுக் கொண்டே இருந்தார். குறிப்பாக டார்கேரியன்களின் வரலாற்றை நூலாகவே வெளியிட்டுவிட்டார்.
'என்ன ஆறாவது நூலை எழுதாமல் இதை எழுதிக் கொண்டிருக்கிறார்' என்று சிலரும் 'எதாச்சும் வெளியிட்டிருக்கிறாரே' என்று பந்திக்கு முன்னால் முறுக்கு என்பது போல சிலரும் உணர்கிறார்கள்.

நான் இரண்டாவது வகை.

இந்த நூல் மிக முக்கியமான ஒன்று. தொடர் மிகப்பிரபலம் ஆகிவிட்ட காரணத்தால் நிறைய மக்கள் பார்க்கத் தொடங்கிவிட்டனர். குறிப்பாக பலரும் டிராகன்களையும் டேனரிசையும் டார்கேரியன்களையும் கொண்டாடிக் கொண்டிருக்கிறார்கள்.  அப்படியிருக்கும் இந்த வேளையில் டார்கேரியன்கள் பற்றி நெற்றிப் பொட்டில் அடித்தாற்போல பல செய்திகளைத் தரும் நூல். நூல் படித்தவர்கள் ஏற்கனவே ஊகித்த தகவல்கள் தான் என்றாலும், ஆசிரியரே உறுதிபடுத்தியது இன்னும் மகிழ்ச்சி.

1. Targaryens and Dragons are not immune to fire. (We already knew this from the main series and prequels)
2. Danearys' dragon eggs came from the Targaryen clutch.  (Theory confirmed)
3. Dragons are pure evil.
4. We get some insight about doomed Valyria.

இது போக வேறு பல  ஊகங்களுக்கும் நூல் இடம் தருகிறது. ஆக மொத்தம் ஆறாவது நூல் வரும் வரை படிப்பதற்கு மற்றுமொரு நூல்.
அடுத்து ஆறாவது நூல் வெளியாகுமா இல்லை இந்த நூலின் இரண்டாம் பாகம் வெளியாகுமா என்பது மார்டினுக்கே வெளிச்சம். 

நவீன இலக்கியங்களில் பெண்கள்

பெண்கள் நாளன்று இதை எழுத வேண்டும் என்று தோன்றியது.  தொடர்ந்து மீமிகைக் கற்பனை கொண்ட நூல்களை வாசித்து வருகின்றேன். அவற்றில் பெண்களுக்கான இடமென்பது மிகக்குறைவு, அப்படியே இருந்தாலும் ஒரிரு பெண்களை மட்டுமே அவை கொண்டாடுகின்றன. நான் இங்கு சொல்ல வருவது அதையும் தாண்டியது.
J.R.R Tolkien இன் நூல்களில் (The Lord of Rings) பெண்களே இல்லை என்பதால் ஒதுக்கிவிடலாம் (ஐயோ இரண்டு மூன்று பேர் இருக்கிறார்களே என்று சொல்ல வேண்டும், அவர்கள் இருந்தும் கதைக்கு என்ன பயன்).
J.K. Rowling இன் நூலில் (Harry Potter) பெண்களுக்கு அதிக இடமுண்டு. ஆனால் கதையில் இரண்டு தோழிகளுக்கோ சகோதரிகளுக்கோ இடையேயான அன்பை, இணக்கத்தை அவர் காட்சிப்படுத்தவே இல்லை. தோழர்கள், சகோதரர்கள் என்றே தான் கதை முழுவதும் பரவிக் கிடக்கும். அதற்கும் மேலே சகோதரிகள் சண்டையிட்டுக் கொண்டே தான் இருப்பார்கள். Lily & Petunia, Lestrange சகோதரிகள் என பெண்கள் ஒருவருக்கு ஒருவர் பெரும்பாலும் எதிரணியிலேயே நிற்பார்கள். ஆனால் ஆண்களை மட்டும் கூட்டமாக இயங்கவல்லவர்களாகவும், சகோதரத்துவத்தைப் போற்றுபவர்களாகவுமே காட்டியிருப்பார்கள்.

George.R.R. Martin இன் நூல்களில் பெண்களுக்கு அதிக இடமுண்டும். (A song of Ice and Fire aka Game of Thrones) அனைத்து வகையான பெண்களும் இருப்பார்கள். ஆனாலும் அவர் கதையிலும் மேலே சொன்ன சிக்கல் சிலவிடங்களில் உண்டு தான். சகோதரிகளுக்குள் இணக்கம் இருக்காது, தோழிகளுக்கான இடமே இல்லை. இந்தக் கதை அமைந்த காலக்கட்டத்தில் பெண்களுக்கு நிரந்தரத் தோழிகள் கிடைக்க மாட்டார்கள் தான், பெண்கள் எப்படி அதை இழக்கிறார்கள் என்ற காட்சிப்படுத்துவதால் அதை ஏற்றுக்கொள்ளலாம். ஆனால் சகோதரிகளிக்கு இடையேயான இணக்கம் ஏன் காட்டப்படவில்லை. Oberyn Martell இன் மகள்கள் இணக்கமாகவும், சேர்ந்து செயல்படுவது போலவும் தான் காட்சிகள் இருக்கும், ஐந்தாவது நூலில் தான் அவர்கள் கதை வருவதால் அடுத்த இரு நூல்கள் வெளி வந்ததும் படித்துவிட்டுத் தான் அதைப் பற்றி மேலே சொல்ல முடியும். தொலைக்காட்சித் தொடர் அவர்கள் கதையை ஓரங்கட்டிவிட்டது, பெண்கள் ஒருவரை ஒருவர் நம்பாமல் இருக்கும் காட்சிகளே முக்கியத்துவம் பெற்றது.

Ursula Kroeber Le Guin இன் நூல்களில் பெண்கள் வலிமை பெற்றவர்களாக இருப்பார்கள், ஆனாலும் ஒன்றுக்கும் மேற்பட்டவர்களுக்கான இணக்கம் என்பது இடம்பெறவில்லை.

எனக்குத் தெரிந்து பெண்கள் சகோதரிகளாகவும், ஒருவரை ஒருவர் நம்புபவர்களாகவும், ஒருவருக்கு ஒருவர் உதவுபவர்களாகவும் காட்டப்பட்டது Robert Jordan இன் The wheel of time நூல்களில் மட்டும் தான்.

இவற்றை எழுதக்காரணம் ஒன்றே ஒன்று தான். மீண்டும் மீண்டும் கதைகளானாலும் சரி நாள்தோறும் நடக்கும் சிறு உரையாடல்களானாலும் சரி பெண்களுக்கு இடையிலான நட்பையும், சகோதரித்துவத்தையும்(!) ஓரங்கட்டிவதையும் சில சமயம் எள்ளி நகையாடுவதையும் பார்க்க முடியும். இரண்டு பெண்கள் சேர்ந்தாலே குழாயடிச் சண்டை போடுவார்கள், புறம் பேசுபவர்கள், இணக்கமாக இருக்க மாட்டார்கள், 'என்னத்த பெருசா' என்பன போன்ற கருத்தாக்கங்களை மீண்டும் மீண்டும் பரப்பி பெண்கள் சகோதரிகளாகவும் தோழிகளாகவும் இணைந்து செயல்படவிடாமல் பார்த்துக் கொள்வது ஏற்புடையது அல்ல. இவற்றை நாம் கடந்தே ஆக வேண்டும்.

பெண்களுக்கு தோளுக்கு தோளாக நிற்கும் அனைத்துப் பெண்களுக்கும் என் பெண்கள் தின நல்வாழ்த்துகள் ❤️❤️

செந்தோட்பருந்து Red-shouldered Hawk.

எங்கள் மாநிலத்தில் அதிகம் காணப்படும் இரையாடி இது எனலாம். 20 நிமிடங்கள் பறவை பார்க்க வெளியே சென்றாலும் இதைப் பார்க்காமல் வீடு திரும்ப மாட்டோம் என்னும் அளவிற்கு இப்பறவை மேரிலாந்தில் நிறைந்திருக்கிறது. பொதுவாகவே வட அமெரிக்கா முழுவதுமே காணப்படும் பறவை தான் இது. 

எங்கள் குடியிருப்புப் பகுதியில் இரண்டு செந்தோட்பருந்துகள் இருக்கின்றன. பெரும்பாலும் சிறு பாலூட்டிகளையும் தவளைகளையுமே உண்டு வாழ்ந்தாலும் இவை அவ்வப்பொழுது சிறு பறவைகளையும் வேட்டையாடுவதால் பலருக்கும் இவற்றைப் பிடிப்பதில்லை.

முன்னர் அடர்ந்த வனப்பகுதியில் மட்டுமே வாழ்ந்து வந்த பறவையினமாகினும் தற்பொழுது நகரமயமாதலுக்கு ஏற்ப தன்னை மாற்றிக் கொண்டு, மரங்கள் நிறைந்த புறநகர்ப்பகுதிகளை தன் வாழிடமாக மாற்றிக் கொண்டிருக்கிறது இப்பருந்து. நெடுஞ்சாலைகளில் பயணிக்கும் போது சாலையோரத்தில் இவை தென்படுவதில்லை.

இதற்குப் பாடும் பருந்து என்னும் பெயரும் உண்டு. காரணம் இனப்பெருக்க காலத்தில் இவை எழுப்பும் ஒலி மிகவும் பெயர்போனது.

எனது வீட்டிற்கு அருகே இருக்கும் பூங்காவில் பார்த்த செந்தோட்பருந்தின் படம் இது.
Feb 03,2019

செந்தோட்பருந்து Red-shouldered Hawk.